Ourense volve situarse no foco mediático pola situación xudicial do seu alcalde, Gonzalo Pérez Jácome, investigado por suposta prevaricación e malversación de fondos públicos.
Desde Podemos Ourense expresaron o seu “absoluto rexeitamento” a que a cidade estea permanentemente ligada a causas penais que afectan directamente ao seu máximo representante, algo que consideran “degradante para a institución e xerador de desconfianza”.
Podemos Ourense pide comisión e moción contra Jácome
Podemos Ourense reclama medidas urxentes tras novas imputacións ao alcalde Gonzalo Pérez Jácome por presunta prevaricación e malversación.
O partido lembra que o rexedor xa fora investigado no mandato anterior por presuntas irregularidades, e agora está imputado de novo pola suposta desviación sistemática de fondos e recursos municipais cara á súa televisión privada, Auria TV.
Entre as prácticas denunciadas figuran a compra de material con cargo ao Concello e o uso dun asesor de Democracia Ourensana como cámara. O recente conflito co interventor municipal, ao que Jácome tivo que readmitir por orde xudicial, é para Podemos outro síntoma “desta deriva institucional”.
A formación critica que PP, PSdeG-PSOE e BNG continúen permitindo esta situación “sen consecuencias reais”, e reclama unha resposta política inmediata. O portavoz municipal, Francisco Diéguez, propón dúas medidas concretas:
- Creación dunha comisión de investigación pública que revise contratos, subvencións e convenios dos últimos sete anos.
- Impulsar unha moción de censura que poida forzar a dimisión do alcalde, “para evitar ter que agardar anos a unha sentenza firme que corrixa o dano causado”.
“Estas propostas non son simbólicas, son un paso decidido para devolverlle á cidadanía unha administración limpa e responsable”, destacou Diéguez, quen chamou a PP, PSdeG-PSOE e BNG a “demostrar que están do lado da legalidade e da ética pública”.
Segundo Podemos, Ourense precisa dunha rexeneración democrática “urxente” para poñer fin a un ciclo de “vergoña” e recuperar un Concello que traballe polos intereses veciñais e non por fins privados.