Os comerciantes da Praza de Abastos número 1 de Ourense non presentaron en prazo o proxecto de traslado dos seus postos desde a Alameda ao edificio recentemente rehabilitado, tal e como lles requirira o Concello.
Agora, o goberno municipal resolverá o expediente nos próximos días. Todo indica que se procederá ao desafiuzamento e á rescisión da concesión da xestión da Praza.
O Concello de Ourense prepara o desafiuzamento dos praceiros da Alameda
“O prazo rematou e os praceiros non presentaron o proxecto. Isto ratifica as nosas sospeitas de que o único que buscan é unha dilación no tempo: non facer nada e seguir na Alameda”, afirmou esta mañá o alcalde de Ourense. Pérez Jácome, explicou que os servizos xurídicos municipais continuarán coa tramitación do expediente. Este podería culminar nun desafiuzamento no prazo de entre 30 e 60 días.
O rexedor anunciou que o seguinte paso será “a toma de decisión baseada en argumentos legais. Todo indica que se incumpriu o convenio e que iso dá lugar á resolución do contrato e ao desafiuzamento da Alameda”. De confirmarse, o Concello licitará a nova xestión da Praza de Abastos para que o edificio reformado poida ser finalmente ocupado.
Pérez Jácome tamén criticou a actitude dos comerciantes, aos que atribúe a intención de “estar toda a vida na Alameda”. Desvelou que a Xunta de Galicia propuxo pagar a maior parte dos custos da construción dos novos stands. Este pago sería a cambio de prolongar o contrato dos praceiros. “Algo de dubidosa legalidade”, sinalou o alcalde, quen advertiu que “se esa manobra que propón a Xunta a fixese o alcalde cunha concesionaria, o PP xa estaría denunciándoo no xulgado”.
O rexedor engadiu que a escusa dos comerciantes é que, se tivesen que asumir parte dos custos, deberían ter máis tempo de contrato como compensación, algo que cualificou de improcedente. “Xa tiveron sete anos de prórroga máis dende o 2018, que lles deu tamén o goberno do PP. É unha manobra para ter unha nova concesión sen licitar”, concluíu.
Acordo e resolución xudicial
A Xunta de Goberno Local do Concello de Ourense acordou o pasado 10 de abril conceder aos praceiros un prazo de tres meses para presentar o proxecto de adaptación do interior da Praza rehabilitada. Este debía ser aprobado polo Concello e, no caso de detectar eivas, corrixilas nun máximo de dous meses. Unha vez aprobado, o proxecto debería executarse nun prazo máximo de seis meses.
A asociación de comerciantes recorreu o acordo e solicitou a súa suspensión cautelar. O Xulgado do Contencioso-Administrativo número 2 de Ourense ditou en setembro un auto favorable ao Concello, denegando as medidas cautelares solicitadas.