A San Martiño volveu demostrar a súa forza entre a mocidade ourensá. A edición número 48 da Carreira Pedestre Popular reuniu unha altísima participación estudantil, un compromiso que o alcalde de Ourense, Gonzalo Pérez Jácome, e o concelleiro de Deportes, Aníbal Pereira, recoñeceron esta mañá coa entrega dos premios aos centros educativos da cidade.
Os responsables municipais agradecéronlle aos centros a súa implicación, salientando que a proba continúa como unha das actividades deportivas con maior capacidade mobilizadora entre a comunidade escolar.
A San Martiño premia o esforzo dos colexios ourensáns
Segundo as bases, o Concello concede 120 euros en material deportivo a cada colexio ou instituto que presentase un mínimo de 25 deportistas clasificados/as.
Ademais, os seis centros de Primaria e os seis de Secundaria con maior participación reciben premios adicionais. Estes van de 300 a 100 euros, tamén en material deportivo.
Na área de Primaria (Sub12 e Sub10) participaron 28 centros, dos que 21 superaron os 25 clasificados/as. O CPR María Auxiliadora Salesianos destacou con 125 participantes. A continuación estiveron Carmelitas (124), CEIP Prácticas (84), CEIP Mestre Vide (84), CEIP A Ponte (79) e CEIP O Couto (71).
En Secundaria (Sub18, Sub16 e Sub14) tomaron parte 25 centros, con 19 superando a marca dos 25 deportistas, e cun claro liderado do IES As Lagoas, que sumou 226 participantes. A continuación situáronse o IES O Couto (170), Divina Pastora (170), IES Blanco Amor (160), IES Otero Pedrayo (146) e IES Ferro Couselo (104).