O escritor galego Jorge Emilio Bóveda presentará a súa última novela, As portas condenadas, este venres 13 de marzo no espazo OZOCOgz Deseño Galego.
O acto contará tamén coa participación do debuxante, pedagogo e músico David González Gándara.
Jorge Emilio Bóveda presenta “As portas condenadas”
A actividade forma parte da programación cultural deste espazo do Carballiño. OZOCOgz continúa apostando pola promoción da literatura galega e polo encontro directo entre autores e lectores.
Durante a presentación, Bóveda achegará ao público os detalles da súa nova obra. Esta novela mergulla ó lector na vida de Eleusis, un personaxe cuxa existencia discorre nunha Auria gris e monótona, marcada por relacións familiares frías, amizades superficiais e un horizonte vital pouco prometedor.
Jorge Emilio Bóveda é considerado un dos autores máis destacados da narrativa galega contemporánea. Bóveda conta cunha traxectoria literaria consolidada e unha obra extensa que abrangue diferentes xéneros. A presentación permitirá ao público coñecer de primeira man as claves desta nova publicación e dialogar co autor nun ambiente próximo.
O acto terá lugar no local de OZOCOgz Deseño Galego, situado na rúa Curros Enríquez, 29, e está aberto ao público interesado en descubrir esta nova proposta literaria da narrativa galega actual.