O programa do Entroido de Maceda 2026 xa está pechado e inclúe máis dun mes de actividades tradicionais, gastronómicas e festivas.
A programación esténdese do 24 de xaneiro ao 21 de febreiro de 2026.
Programa do Entroido de Maceda 2026
O Concello de Maceda volve apostar por un Entroido longo, participativo e vencellado á tradición, no que destacan actos históricos como a Solta do Burro, os Fiadeiros, as Baixadas da Marela e da Mareliña, o Desfile de Entroido e o simbólico Enterro do Meco, que porá o peche oficial ás celebracións.
Arranque do Entroido: xaneiro con tradición
Sábado 24 de xaneiro: terá lugar a Solta do Burro e o reparto de mecos, a partir das 20:00 horas, organizada polo Barullón de Carguizoi e a Asociación de Comerciantes.
31 de xaneiro: celebrarase o tradicional Reinado entre Tioira e Santa Marta, cun percorrido que partirá de Carguizoi ás 16:30 horas e contará con paradas en distintos puntos da parroquia.
Domingo 1 de febreiro: a programación inclúe un obradoiro de Compadres e Comadres, organizado pola ANPA Maceda na Praza das Toldas, con chocolatada final.
Febreiro: gastronomía, música e rituais populares
Venres 6 de febreiro: coincidindo co Venres de Compadres, desenvolverase a II Ruta Tapa do Cocido de Entroido. Estará acompañada dunha foliada polos bares con grupos de pandereteiras e a actuación de Os Festicultores.
Sábado 7 de febreiro: será a quenda do Fiadeiro de Carguizoi, unha das citas máis representativas do Entroido macedán.
Venres 13 de febreiro: Venres de Comadres, destaca a Subida dos Carros coa Felga, a Cea de Comadres na Diligencia e unha nova edición da Ruta do Cocido. A xornada rematará cun pasabares nocturno.
Fin de semana grande do Entroido de Maceda 2026
Sábado 14 de febreiro: arrancará cunha saída en autobús aos Felos, pasabares con charangas, a Baixada da Marela e actuacións musicais ata a madrugada.
Domingo 15: a xornada estará marcada polo Fiadeiro de Calvelo, o Cocido de Entroido e diversas foliadas abertas ao público.
Luns 16 de febreiro: terá lugar a Baixada da Mareliña, con saída desde o Castelo de Maceda e actuación familiar ao remate.
Martes 17 de febreiro: Maceda acollerá o Desfile de Entroido, cunha actuación musical posterior e a entrega de premios ás 20:00 horas.
Peche coa despedida do Meco
Sábado 21 de febreiro: celebrarase o Enterro do Meco, con pancetada popular, desfile fúnebre a cargo da Charanga A Felga e o peche simbólico do Entroido 2026 no concello.
