O grupo municipal socialista de Ourense, a través da súa portavoz Natalia González Benéitez, denunciou a «chapuza» levada a cabo pola Xunta de Galicia na contorna do centro de saúde de A Ponte.
En resposta a esta situación, o grupo parlamentario do PSdeG presentou unha serie de iniciativas co obxectivo de instar ao goberno autonómico a corrixir «á maior brevidade» as deficiencias detectadas na intervención realizada nas inmediacións das instalacións sanitarias.
O PSdeG denuncia a «chapuza» da Xunta na contorna do centro de saúde de A Ponte
En concreto, os socialistas, da man da deputada Carmen Rodríguez Dacosta, esixen a retirada dos neumáticos empregados na obra e a substitución do céspede artificial por unha alternativa máis respectuosa co medio ambiente. Segundo sinalan desde o PSdeG, «as actuacións en materia de urbanismo deberían implicar maior rigor no canto de atentar contra a saúde da cidadanía».
Ademais, o grupo socialista interpelará ao executivo de Alfonso Rueda para coñecer se considera que a intervención realizada é a adecuada e sostible desde o punto de vista medioambiental, cal foi o orzamento destinado a esta actuación e se prevé a retirada dos microplásticos e do céspede artificial.
Finalmente, a portavoz socialista lembrou que esta non é a primeira vez que o goberno galego actúa en prexuízo do centro de saúde de A Ponte, recordando que xa no pasado se viu afectado pola construción da estación de autobuses, o que o converteu en parte dunha glorieta.