O PSdeG denunciou este venres que a Xunta de Galicia, gobernada polo PP, está a deixar á provincia de Ourense fóra do Fondo de Compensación Interterritorial (FCI), principal instrumento estatal para reducir desigualdades territoriais.
A advertencia foi realizada pola deputada autonómica Carmen Rodríguez Dacosta, o secretario provincial do PSdeG, Álvaro Vila Araújo, e a secretaria xeral na cidade, Natalia González Benéitez, nunha rolda de prensa en Ourense.
Ourense, excluída do Fondo de Compensación Interterritorial segundo o PSdeG
Segundo explicou Vila Araújo, este fondo debe destinarse aos concellos con maiores necesidades para mellorar infraestruturas e servizos, pero “Ourense leva anos discriminada pola Xunta, que reparte os recursos sen criterios claros nin transparentes”.
O socialista reclamou que se actualice tamén o Fondo de Cooperación Local, conxelado dende hai 15 anos, para adaptalo ás necesidades dos municipios ourensáns e garantir servizos de calidade.
Rodríguez Dacosta cualificou a xestión do PP como “inxusta, opaca e discrecional” e lembrou que o FCI, previsto na Constitución, se reparte ás comunidades autónomas en base a poboación, superficie ou singularidades xeográficas, pero que despois “o reparto interno entre provincias carece de transparencia e participación municipal”.
Os datos do Consello de Contas revelan que en 2022 o 95% dos fondos se destinou a Pontevedra, mentres que Ourense e Lugo non recibiron “nin un euro”. Un feito que os socialistas consideran especialmente grave tendo en conta que Ourense é a provincia galega máis afectada pola perda de poboación, co maior índice de envellecemento de Europa, menor renda per cápita e un elevado risco de pobreza.
O PSdeG subliñou que Galicia dispoñía en 2022 de 102,5 millóns de euros do FCI, pero a Xunta executou menos da metade, deixando sen usar máis de 50 millóns que pasaron ao exercicio seguinte, sen garantías de que se invistan nas provincias máis desfavorecidas. “Non podemos permitir que a principal ferramenta de cohesión territorial non chegue ás zonas que máis o precisan. Ourense non pode seguir sendo discriminada”, concluíu Rodríguez Dacosta.