A voceira socialista e secretaria de política social da CENG do PSdeG, Natalia González, mantivo esta mañá un encontro coa presidenta da Asociación de Familias Monomarentais de Galicia (FAGAMOS), Inmaculada Alonso.
O obxectivo da xuntanza era atender as demandas históricas deste colectivo e fortalecer redes de colaboración.
O PSdeG comprométese coas familias monomarentais de Ourense
Na reunión tamén participaron o secretario xeral do PSdeG, José Ramón Gómez Besteiro, e a deputada Silvia Longueira, quen mostraron o seu apoio ás reivindicacións da entidade. González destacou a importancia de visibilizar a realidade das familias monomarentais. Natalia González destacou que en Ourense superan as 5.000, e subliñou a situación de vulnerabilidade na que viven moitas delas.
Durante o encontro, a representante socialista comprometeuse a trasladar as demandas ao Concello de Ourense, lamentando a “falta de sensibilidade” do actual Goberno municipal. Recordou que o executivo local rexeitou as emendas do grupo socialista á ordenanza da auga. Nesas emendas propoñíanse bonificacións sociais específicas para as familias monomarentais.
González insistiu en que é necesario avanzar en políticas públicas que garantan igualdade de oportunidades e apoio ás nais e pais que afrontan en solitario a crianza dos seus fillos e fillas. Os socialistas fan un chamamento á cooperación institucional para mellorar a súa calidade de vida.
