A secretaria xeral do PSdeG de Ourense, Natalia González, presentou esta mañá a cuarta edición da xornada Ourense X Bandeira.
Este evento está coorganizado polo PSdeG a nivel autonómico, provincial e local, xunto coas Xuventudes Socialistas de Galicia (XSG).
O PSdeG reivindica a diversidade na IV xornada Ourense X Bandeira
González destacou que a continuidade desta cita “amosa o compromiso do partido co colectivo LGBTI e coa necesidade de seguir poñendo o foco en cuestións que outras formacións políticas seguen sen abordar”.
Segundo explicou, o encontro servirá para facer un percorrido polos últimos 20 anos de avances en dereitos LGBTI impulsados polo Partido Socialista. Tamén servirá para analizar o papel das mulleres dentro do movemento e as dificultades ás que se enfrontan.
“É unha xornada aberta a toda a cidadanía de Ourense. Queremos que todas as entidades interesadas poidan participar, compartir a súa visión e trasladar as súas demandas”, sinalou González.
Pola súa parte, o coordinador provincial das Xuventudes Socialistas, Borja López, subliñou que “os dereitos non se regalan: conquístanse, deféndense e protéxense cada día”. En palabras súas, “non é só un acto, senón unha declaración política e un compromiso ético que demostra que Ourense é unha cidade diversa, libre e orgullosa de si mesma”.
Tamén participou na presentación o secretario LGBTI do PSdeG en Ourense, Javier Alén, quen detallou o programa do evento. Esta xornada celebrarase o sábado 25 de outubro, na Cafetería Mus (rúa Xoán XXIII), entre as 10:00 e as 14:00 horas.
A primeira mesa reunirá a Kevin Pérez, investigador predoutoral en diversidade e secretario LGBTI de JSE; Teresa Barge, tenente alcalde de Celanova; e Antonio Giraldo, concelleiro do PSOE en Madrid. A segunda mesa, a partir das 12:30 horas, contará coa participación de Beth Giraldo, activista polos dereitos trans e vicepresidenta de COGAM, e Noemí Díaz, concelleira do Goberno Municipal da Coruña.
Desde o PSdeG reivindican esta cita como “un espazo de reflexión, compromiso e defensa dos dereitos LGBTI fronte ás políticas de retroceso das dereitas reaccionarias”.