O PSdeG-PSOE de Ourense homenaxeou este domingo na Terrachán, en Entrimo, a Undina Álvarez Pérez, veciña da aldea de Ferreiros, asasinada polos fascistas en 1936 en represalia polas súas ideas republicanas.
Este acto, cargado de emoción, reuniu ducias de persoas para lembrar e recoñecer a quen foi “fiel ás súas ideas” e pagou coa súa vida ese compromiso.
O PSdeG-PSOE homenaxea a Undina Álvarez en Entrimo
Na homenaxe participaron o alcalde de Entrimo, Ramón Alonso; o secretario provincial de Memoria Democrática, Xosé Lois Carrión; e o mestre e cofundador da AMD-CAO, Xosé Lois Gómez.
A cita foi coorganizada polo PSdeG-PSOE de Ourense, Xuventudes Socialistas e a Asociación de Memoria Democrática Campo de Aragón. Tras as intervencións, realizouse unha ofrenda floral na Sobreira, diante do monolito ás vítimas do fascismo e do franquismo.
Undina Álvarez foi detida en Entrimo e trasladada á prisión de Bande, habilitada como cárcere improvisado de mulleres. Sufriu malleiras, humillacións e torturas psicolóxicas, sen ningún tipo de xuízo. O 30 de setembro de 1936 foi fusilada no antigo cuartel de San Francisco, hoxe coñecido como Campo de Aragón.