O Grupo Municipal do PSdeG-PSOE de Ourense levará ao vindeiro Pleno unha moción para instar ao Goberno municipal a redactar e executar un proxecto de remodelación integral do Parque da Alameda do barrio de A Ponte, o máis simbólico da zona e en evidente estado de abandono.
A voceira socialista Natalia González reclama actuación urxente no espazo máis emblemático do barrio.
O PSOE propón a remodelación integral do Parque da Alameda de A Ponte
A proposta foi presentada pola voceira socialista, Natalia González Benéitez. O texto lembra que o parque foi inaugurado o 18 de xullo de 1968, sobre os terreos da antiga segunda estación ferroviaria de Canedo, e destaca o seu valor como espazo público clave para a veciñanza.
O parque ocupa máis de 3.300 metros cadrados e conta cunha fonte luminosa, zonas infantís, aparellos biosaudables, mobiliario urbano e unha importante masa arbórea. Porén, segundo denuncia o PSOE, hoxe presenta un aspecto “descoidado e degradado”. Este espazo conta con xogos infantís deteriorados, papeleiras rotas, maleza, a fonte inoperativa e pintadas nos seus arredores.
“O parque da Alameda é un lugar de encontro interxeracional para os pontinos e pontinas e merece unha actuación en profundidade, non un simple lavado de cara ou arranxos puntuais que non resolven nada”, afirma González Benéitez, en referencia crítica á intervención realizada durante o mandato de Jesús Vázquez.
O acordo da moción solicita que a redacción do proxecto e a súa execución estean recollidas nos Orzamentos municipais de 2025. González Benéitez solicita que estes orzamentos conten cunha partida económica específica para este fin.
