O refuxio climático na avenida Otero Pedrayo dá un novo paso en Ourense tras a sinatura do convenio entre o Concello e a Xunta de Galicia.
O alcalde de Ourense, Gonzalo Pérez Jácome, e a conselleira de Medio Ambiente e Cambio Climático, Ángeles Vázquez Mejuto, formalizaron esta mañá no Centro Cultural José Ángel Valente o acordo de colaboración para desenvolver este proxecto, que contará cun orzamento de 340.000 euros.
Concello e Xunta apostan por aliviar a calor en Ourense
A iniciativa permitirá executar diversas actuacións nesta importante arteria urbana co obxectivo de reducir o impacto da calor extrema e mellorar o confort térmico da cidadanía.
Segundo explicou a conselleira, o proxecto dispón do apoio e asesoramento estratéxico da universidade, o que achega unha base científica ás medidas que se van implantar para mitigar as altas temperaturas.
Durante o acto, Vázquez Mejuto salientou que este tipo de intervencións resultan clave nun contexto de cambio climático, xa que contribúen a crear espazos urbanos máis resilientes e adaptados ás novas condicións ambientais.
Pola súa banda, o alcalde de Ourense lembrou que se trata dunha demanda histórica da cidade, recoñecida como a máis calorosa do norte de España. O rexedor agradeceu o investimento da Xunta, aínda que advertiu das limitacións da actuación: “Isto non vai acabar coa calor, pero si axudará a aliviala”. Ademais, instou tanto ao Goberno galego como ao estatal a manter unha colaboración continuada no tempo, máis alá de actuacións puntuais ou anuais.
Un comentario