O Concello de Ourense renovará a área de xogos infantís do Parque Ribeira de Canedo tras adxudicar o contrato para modernizar este espazo de lecer moi utilizado polas familias do barrio.
A actuación contará cun investimento de 48.396,60 euros e incluirá a subministración e instalación de novos xogos, ademais da adecuación do terreo e a mellora das condicións de seguridade da zona infantil.
Ourense renovará o parque infantil da Ribeira de Canedo
Entre os elementos que se incorporarán destacan unha estrutura temática con forma de xirafa, un xogo de caracol, unha randeeira dobre con asento plano e tipo berce e unha casiña con xardín, pensados para ampliar as opcións de xogo e fomentar a actividade ao aire libre dos máis pequenos.
Os traballos tamén contemplan a retirada dos xogos actuais, a preparación e nivelación do terreo, a instalación de xeotéxtil e area de sílice, así como a colocación de bordos e outros elementos necesarios para garantir a seguridade da área.
O prazo de execución será de 30 días a partir de hoxe, 10 de marzo.
