O Concello de Ourense completou a restauración do histórico cruceiro de pedra do complexo cultural de San Francisco, que xa loce no seu lugar tradicional, xunto á capela da Venerable Orde Terceira Franciscana —hoxe sala de exposición permanente do Museo Arqueolóxico—, potenciando así a súa presenza nun dos espazos patrimoniais máis relevantes da cidade.
A peza resultara danada por un vehículo, o que obrigou a executar traballos especializados de recuperación, tratamento e recolocación.
Ourense restaura e protexe o cruceiro histórico de San Francisco
A intervención, acometida pola empresa Riela Obras e Servizos cun investimento de 17.956,40 euros, incluíu tamén unha remodelación da contorna para mellorar a visibilidade do cruceiro e evitar novos incidentes.
O cruceiro, caracterizado pola ausencia de grupos escultóricos e imaxes figurativas, contou con diversas ubicacións ao longo da súa historia. Situouse na rúa da Estrela —tamén coñecida como Carreira dos Defuntos ou Quebracús—, no Centro Histórico, e na antiga estrada de Maceda, hoxe rúa Emilia Pardo Bazán.
O seu emprazamento actual intégrase no cemiterio de San Francisco, declarado Ben de Interese Cultural (BIC) polo Decreto 31/2000 do 11 de febreiro, un espazo protexido no que tamén se atopa a citada capela da Orde Terceira Franciscana.
Aposta polo patrimonio urbano
Esta actuación súmase á liña de traballo coa que o Concello busca coidar e poñer en valor o patrimonio urbano. Nos últimos meses desenvolvéronse accións como a restauración dos farois da Torre de Ourense, dos situados no acceso á Alameda e do cruceiro do Outo do Cumial.
Paralelamente, están en marcha intervencións na fonte de San Miguel de Canedo e nos lavadoiros de Cachaxúas e Ponte do Val, ás que se engadirán proximamente as actuacións previstas nos lavadoiros de Casardomato e Seixalbo.