O Concello de Ourense está a executar e planificar intervencións de restauración en fontes e lavadoiros do municipio, elementos cargados de memoria colectiva e de gran valor cultural.
Con estas actuacións, o goberno local busca recuperar o esplendor orixinal destas construcións e protexer a historia e o patrimonio inmaterial que representan para as parroquias e barrios da cidade.
O Concello de Ourense impulsa a restauración de fontes e lavadoiros históricos
Na actualidade, o Concello está a desenvolver traballos de recuperación cun investimento superior aos 35.000 euros, centrados en tres puntos emblemáticos:
- Fonte de San Miguel de Canedo, cun orzamento de 12.110,33 euros.
- Lavadoiro de Cachaxúas, con 5.980,64 euros.
- Lavadoiro da Ponte do Val, con 17.655,26 euros.
Estas actuacións enmárcanse na aposta municipal pola conservación do patrimonio etnográfico e pola valorización dos espazos que foron durante décadas centros de convivencia e de vida comunitaria.
Próximas intervencións
O Concello de Ourense xa anunciou novas actuacións que se executarán nas vindeiras semanas:
- Lavadoiro de Casardomato, cun investimento de 17.998,75 euros.
- Cuberta do lavadoiro de Seixalbo, cun custo de 13.458,83 euros, coa finalidade de garantir a súa protección e conservación fronte ás inclemencias meteorolóxicas.