O Sanysec – Ourense Atletismo competiu no Campionato de España Absoluto de Pista Curta e sumou nove medallas no Galego sub20 en Expourense, confirmando o seu excelente momento deportivo.
O club ourensán estivo representado por catro atletas no nacional absoluto baixo teito.
Sanysec–Ourense brilla no Estatal e Galego
A mellor actuación chegou da man de Andrea Reija, cuarta no pentatlón con 3.877 puntos, a só 58 da medalla de bronce lograda por Ivet Rovira, do L’Hospitalet Atletisme.
Reija destacou no lanzamento de peso, onde foi segunda con 11.72 metros, mentres que na lonxitude asinou o seu rexistro máis discreto, cun undécimo posto grazas a 5.23 metros.
Tamén acadou posto de finalista Iria Solera no salto de altura. A súa marca de 1.75 metros deulle a oitava posición nun concurso moi axustado, no que da terceira á novena clasificada todas superaron a mesma altura. Dous nulos sobre 1.75 deixárona sen opción de medalla.
No salto con pértega, Manuela Blanco terminou novena con 3.60 metros, única altura válida no seu concurso, xa que non puido franquear o 3.80. Pola súa banda, Daniela Rubio foi décimo quinta no triplo salto cun mellor intento de 11.58 metros, afastada dos 12.65 que daban acceso á mellora.
Fóra de concurso competiu Andrea Purica nos 60 lisos ao non ter nacionalidade española. Impúxose na súa eliminatoria con 7.24 e na semifinal con 7.29. De poder disputar a final, os seus rexistros daríanlle a medalla de prata.
Nove medallas no Galego sub20 en Expourense
O bo momento do club confirmouse no Campionato Galego sub20 de pista curta, celebrado en Expourense, onde o Sanysec – Ourense Atletismo sumou nove metais e máis de 40 participacións.
Ouros
- Susana Padrón (10:34.86 nos 3.000)
- Miguel Carbajales (4.50 en pértega)
- Marta Quiroga (2.91 en pértega)
Pratas
- Joel Abeso (22.70 nos 200)
- Raúl Gude (6.57 en lonxitude)
- Antía Calvo (5.24 en lonxitude)
Bronces
- Ana Novoa (10.19 en peso)
- Joel Abeso (7.09 nos 60 lisos)
- Rocío Marín (9.48 nos 60 valos)
- Irene Serantes (1:01.22 nos 400)