O Sanysec – Club Ourense Atletismo asinou unha destacada fin de semana con medallas no Campionato de España Sub23 de Pista Curta e múltiples podios nos autonómicos de veteráns e lanzamentos.
Entre o 7 e o 8 de febreiro disputouse en Sabadell o nacional Sub23 en pista cuberta, onde a entidade ourensá contou con tres representantes.
O Sanysec Ourense Atletismo suma medallas nacionais e galegas
A actuación máis salientable foi a de Manuela Blanco, que logrou a medalla de bronce en salto con pértega cun mellor intento de 3.72 metros. A competición resultou moi esixente, cun novo récord do campionato para Naiara Pérez (4.30), mentres Marta Mohedo foi segunda con 3.77. Blanco superou á primeira os 3.62 e os 3.72, asegurando o terceiro chanzo do podio.
Tamén competiu Daniela Rubio, que participou en triplo salto e salto de altura. No triplo foi quinta con 11.98 metros, quedando a 21 centímetros da terceira posición. En altura acadou o sexto posto con 1.67 metros. Tras un nulo sobre 1.70, decidiu arriscar e realizou os dous intentos restantes sobre 1.72, sen fortuna.
Pola súa banda, Leyla Villar tomou parte nos 1.500 metros. Cun tempo de 4:58.17 terminou undécima na súa semifinal. O pase á final quedou reservado ás catro primeiras de cada serie, cun corte fixado en 4:46.27.
Oito medallas no Galego de Veteráns
En Expourense celebrouse o Campionato Galego de Veteráns de Pista Curta, onde o club sumou un total de oito medallas.
En lonxitude M45, Sergio Herrería proclamouse campión con 4.66 metros. Nos 3.000 marcha F50, dobre podio con ouro para María Grande (17:53.53) e prata para Soledad Pousa (19:45.39). En 1.500 F45, Ana Isabel Soutullo foi segunda con 5:21.32.
No lanzamento de peso M80, Julio Fernández logrou o ouro con 7.02 metros. Nos 800 M45, Antonio Touza foi terceiro con 2:15.63, mentres que nos 800 F45, María Esther Romasanta acadou tamén o bronce con 3:06.27.
Ademais, nos 400 M45, Touza sumou unha prata con 58.99. A participación completouse con postos destacados en probas de velocidade.
Nove medallas nos Lanzamentos Longos Sub18/Sub20
En Pontevedra disputouse o Campionato Galego de Lanzamentos Longos Sub18/Sub20, cun balance de nove medallas para o Sanysec.
En martelo Sub18 masculino, Javier Cid foi campión con 62.02 (MMP) e Hugo Nóvoa segundo con 47.25. No martelo Sub18 feminino, Irene Conde logrou a prata con 46.94 (MMP) e Uxía Nogueira o bronce con 43.35 (MMP).
Na xavelina Sub18 feminina, Adriana Ferreiro foi segunda con 32.11, mentres que na masculina Manuel Eirín acadou o ouro con 46.18.
No disco Sub18 feminino, dobre éxito con Aitana Capeáns, campioa con 38.35, e Sabela Vázquez, segunda con 31.43. En disco Sub18 masculino, Hugo Nóvoa sumou outra prata con 41.24.
Sabela Vázquez completou a súa participación cunha meritoria quinta posición no disco Sub20.
Ouro sub16 para Mario Casal
No Campionato Galego de Lanzamentos Longos Sub16, Mario Casal protagonizou a mellor actuación do club ao proclamarse campión galego de disco cun mellor lanzamento de 41.30 metros, conseguido no último intento.
No martelo de 4 kg, Casal foi bronce con 44.96, mentres Mauro Gómez ocupou a sexta praza con 22.84. Na categoría feminina, Sara Vázquez quedou cuarta en xavelina con 32.45 metros.
O conxunto ourensán confirma así o seu bo momento competitivo, con presenza destacada en campionatos nacionais e un amplo dominio nas probas autonómicas de pista curta e lanzamentos.