O ximnasio Estudio A Valenzá de Barbadás acolleu esta semana un taller de formación en habilidades persoais de autodefensa dirixido a mulleres.
A actividade foi organizada pola ONG valoReSC innovation no marco do seu programa A Tribo de Malala, unha iniciativa de apoio e crecemento para mulleres en situación de vulnerabilidade, coa colaboración da Consellería de Política Social e Igualdade da Xunta de Galicia.
Taller de autodefensa para mulleres en Barbadás
Durante o obradoiro, monitoras do propio ximnasio ensinaron técnicas prácticas de defensa fronte a agresións machistas, empregando obxectos cotiáns como bolígrafos, chaves, pintalabios ou teléfonos móbiles. O obxectivo foi traballar aspectos clave como a autoconfianza, o autocontrol, a autoprotección e a seguridade persoal.
Ademais das técnicas físicas, as participantes recibiron formación en comportamentos preventivos e medidas para evitar situacións de risco. A ONG valoReSC destacou que este tipo de actividades son fundamentais para reforzar a prevención e dotar ás mulleres de recursos reais ante posibles agresións.
O programa A Tribo de Malala ofrece apoio mutuo, oportunidades, formación e espazos seguros para mulleres que buscan ferramentas para transformar as súas vidas, cun enfoque baseado na educación, a protección e a solidariedade.
