A tenda solidaria das voluntarias +60 de Afundación abrirá a vindeira semana no CHUO, promovendo a creatividade, o reciclaxe e a solidariedade que caracteriza ao programa «O valor da experiencia» da Obra Social de ABANCA.
As 36 persoas voluntarias que participan neste programa en Ourense comparten durante todo o ano horas e aprendizaxes nos obradoiros dos espazos +60.
Afundación abre en Ourense a súa tenda solidaria de Nadal
Cada decembro, dan un paso máis con esta iniciativa solidaria para apoiar entidades como a delegación ourensá da Asociación Española contra o Cancro. A tenda estará aberta os días 2 e 3, de 10:00 a 14:00 horas, nas instalacións do Complexo Hospitalario Universitario de Ourense.
Quen visite o mercado atopará almofadas, manteis, bolsos, mandís, carteiras e produtos de Nadal, elaborados artesanalmente nos obradoiros. En moitos casos, os artigos elaboráronse con materiais reciclados procedentes de prendas ou doutros obxectos usados, reforzando o espírito creativo e sustentable do grupo.
Almofadas que cambian vidas
As coñecidas almofadas solidarias en forma de V son un exemplo do labor destas persoas voluntarias. Confecciónanas a partir dun patrón internacional deseñado en 2001 nos Estados Unidos para facilitar a recuperación das persoas tratadas de cancro de mama. O seu formato evita o roce do brazo coa zona operada, favorece o descanso e ofrece protección durante o proceso de curación.
O grupo ourensán colabora coa Asociación contra o Cancro desde 2001. Primeiro actuaron só na cidade, e pouco despois estenderon o seu labor solidario a Verín e O Barco de Valdeorras. O seu «Obradoiro de Reciclaxe e Solidario» implica tamén á comunidade do Espazo +60, que aporta teas, fíos e botóns para darlles unha segunda vida.
Maiores activos e comprometidos
Esta actividade fomenta hábitos de reciclaxe, creatividade e cooperación, consolidando o papel activo das persoas maiores na sociedade. Forma parte do programa «O valor da experiencia», que impulsa accións de voluntariado interxeracional, educativo, social e ambiental en toda Galicia.
O mercado de Ourense é o primeiro dos cinco que Afundación impulsa este mes en Galicia, xunto cos de Betanzos, Pontevedra, Ferrol e Viveiro. Na cidade das Burgas, este obradoiro solidario é o máis antigo da entidade: naceu en 1998. Nos seus primeiros anos recadaba fondos para a Misión de Jipijapa en Ecuador, e desde 2001 destino os beneficios á Asociación Contra o Cancro en Ourense. O pasado outubro, as voluntarias entregaron novas almofadas solidarias no CHUO e no Hospital de Verín.