A tosta de vitello tonnato do Bar Pazos conquistou tanto ao público como ao xurado “VIP” na quinta edición do certame gastronómico “Toén a Bocados”, cuxos premios se entregaron este mércores 25 de xuño ás 21:30 horas na Casa do Concello.
O evento contou tamén co sorteo de agasallos entre as persoas participantes na votación popular.
Toén a Bocados premia os mellores petiscos do ano
Na categoría de xurado popular, os galardóns foron para:
- 🥇 Bar Pazos – Tosta de Vitello Tonnato
- 🥈 Casa Ana – Petisco de Mugares
- 🥉 Café Bar Venecia – Tosta Fusión
Pola súa parte, o xurado “VIP”, formado por persoas convidadas pola organización, coincidiu no primeiro premio para o Bar Pazos e completou o podio con:
- 🥇 Bar Pazos – Tosta de Vitello Tonnato
- 🥈 Casa do Peso – Bollito Volcán
- 🥉 Café Bar Venecia – Tosta Fusión
O Concello de Toén agradeceu a implicación dos establecementos participantes, que durante os tres días de duración do certame despacharon máis de 1.500 pinchos. Tamén recoñeceu o labor do xurado e a boa acollida por parte dos veciños e visitantes, que volveron converter “Toén a Bocados” nunha festa da gastronomía local.
Nos vindeiros días, a organización contactará cos premiados do sorteo de agasallos vinculados á votación popular.
