O Tribunal Supremo confirma a vulneración de dereitos fundamentais no Pleno do Concello de Ourense, segundo informou esta mañá o grupo municipal socialista nunha comparecencia ante os medios.
As edís do PSOE deron conta dunha resolución xudicial firme que, segundo destacaron, ten “máxima relevancia institucional” para a cidade.
O Supremo confirma vulneración de dereitos no Pleno de Ourense
A concelleira María Fernández Ojea explicou que o alto tribunal ratifica, sen posibilidade de recurso, que durante o desenvolvemento de sesións plenarias se produciron vulneracións do dereito á participación política e ao uso da palabra por parte da oposición.
O fallo do Tribunal Supremo conclúe que estas prácticas resultaron contrarias ás garantías democráticas básicas que deben rexer o funcionamento dun órgano representativo como é o Pleno municipal.
“Non se trata dunha discrepancia política nin dun conflito partidario, senón dunha vulneración acreditada xudicialmente”, subliñou Fernández Ojea. A edil incidiu en que a sentenza deixa claro que se quebrantaron dereitos fundamentais no seo da institución local.
Condena en costas ao alcalde
As representantes socialistas lembraron tamén que o Supremo condena ao alcalde ao pagamento das costas procesuais ao considerar infundado o recurso interposto, ao non presentar argumentación suficiente.
“O máis grave é que este procedemento podería terse evitado cun comportamento institucional correcto e respectuoso cos dereitos fundamentais dos representantes electos. Pola contra, optouse por prolongar o conflito ata a máxima instancia xudicial do Estado”, lamentaron, en alusión ao que cualifican como unha estratexia dilatoria.
Desde o grupo municipal socialista consideran imprescindible que a sentenza firme se poña en coñecemento do Pleno coa máxima inmediatez e que se adopten medidas para garantir que feitos similares non volvan producirse.
“Non é normalidade democrática”
A secretaria xeral do partido na cidade e portavoz municipal, Natalia González, quixo afastar a interpretación partidaria do fallo xudicial.
“Falamos de algo moito máis serio: de que en Ourense foi necesario que o Tribunal Supremo interviñese para garantir dereitos fundamentais básicos no Pleno municipal. Iso non é normalidade democrática. Ourense merece un goberno que respecte as institucións, a pluralidade e as regras do xogo democrático sen que teña que llo lembrar un xulgado”, afirmou.
O grupo socialista insiste en que a resolución xudicial marca un precedente relevante para o funcionamento institucional do Concello de Ourense e para a garantía dos dereitos da oposición na vida política local.