O Concello de Barbadás pon en marcha unha nova edición do ciclo “O verán é cultura”, que encherá de actividades o Parque dos Patos na Valenzá durante os meses de xuño, xullo e agosto.
A programación inclúe concertos, espectáculos teatrais e funcións de circo pensadas para todos os públicos.
Barbadás celebra o seu verán cultural 2025 con teatro, música e circo
Todos os espectáculos desenvolveranse os xoves ás 21:00 horas, salvo unha excepción. Esta iniciativa ten unha marcada aposta pola cultura de proximidade e o lecer ao aire libre.
O ciclo arrinca o mércores 25 de xuño coa actuación da Banda de Música Infantil de Barbadás. Ao día seguinte, o xoves 26, será a quenda da Banda de Música da localidade. A primeira proposta escénica chegará o 3 de xullo co espectáculo “Circo dobre expresso” da compañía Desastronauts.
Durante o mes de xullo tamén haberá música de raíz galega e portuguesa. A programación conta coa actuación de En Mala Hora o día 10 e a Noite de Fados con Marlene Rodrigues, titulada “Mar de Fado”, o 17 de xullo. O 31 dese mes, Inventi Teatro presentará “A libraría máxica”, unha peza que mestura maxia e narración oral.
En agosto a programación continúa co espectáculo “The Picole Teatro” a cargo da compañía Trécola Producións (día 7); o número “Tranvía nº12” de Finestra Nou Circ (día 21); e o concerto de peche da banda Gin Toni’s, o xoves 28 de agosto.
As actividades desenvolveranse no Parque dos Patos. En caso de choiva ou mal tempo pasarán ao CEIP Filomena Dato ou ao Auditorio da Casa da Cultura.