O PSdeG e as Xuventudes Socialistas de Ourense propoñen un programa público de alugueiro e un plan específico de vivenda xuvenil, aliñados coas medidas presentadas esta semana para abordar a crise da vivenda na cidade.
Estas iniciativas buscan reverter a escalada dos prezos e a falta de oferta que afectan especialmente á xente nova.
PSdeG e XSO presentan plan para garantir vivenda xuvenil en Ourense
A problemática da vivenda en Ourense impacta con forza na mocidade, cun mercado insuficiente e prezos desorbitados. “Os alugueiros disparáronse nos últimos anos e a oferta non cobre a demanda”, advirte Miguel Gómez, secretario xeral da organización xuvenil. Daniel Barredo, coordinador provincial, engade que “as poucas vivendas accesibles presentan condicións deficientes ou prezos prohibitivos”.
A situación provoca que moitos mozos e mozas abandonen a cidade en busca de mellores oportunidades, agravando a crise demográfica. Por iso, as propostas inclúen que o Concello de Ourense actúe como intermediario entre propietarios e inquilinos, cun programa de alugueiro público con prezos regulados, incentivos fiscais e garantías de cobro. “As propietarias contarían con incentivos económicos e asistencia xurídica”, explicou Xurxo Doval, secretario xeral das Xuventudes Socialistas de Galicia.
O plan tamén contempla converter espazos baleiros no casco histórico en vivenda protexida, especialmente para menores de 35 anos, e alcanzar nun prazo de vinte anos un 20% de vivenda pública ou protexida no Casco Vello, aproveitando fondos europeos, estatais e autonómicos como o Plan Rexurbe.
Estas propostas complementan as medidas xa presentadas polo grupo municipal socialista, como a elaboración dun censo de vivendas baleiras e abandonadas e a creación dunha comisión específica para o seguimento do Plan Rexurbe.