A X Gala contra o Cancro de Ourense celebrou hoxe a súa presentación oficial na sede da Asociación Española contra o Cancro (AECC), un acto no que se destacou o valor cultural e solidario dun evento que xa forma parte da identidade da cidade.
A gala, que cumpre dez anos, reunirá música, humor e danza o sábado 29 de novembro, ás 20.30 h, no Auditorio Municipal.
Presentan a X Gala Contra o Cancro de Ourense
David Rodríguez, organizador e presidente da Asociación Cultural As Canellas, encabezou a rolda de prensa xunto ao presidente da AECC en Ourense, Germán Rodríguez-Saá.
Ambos puxeron en valor o compromiso dun proxecto que, edición tras edición, combina apoio á investigación e atención ás persoas afectadas cun espectáculo artístico de primeiro nivel.
Unha década de compromiso solidario
Na súa intervención, David Rodríguez expresou a emoción de chegar a esta edición tan especial. “Non imaxinades o orgullo que supón chegar a esta décima Gala contra o Cancro. Conseguimos unir a loita contra esta enfermidade coa creatividade e a esperanza que transmiten os espectáculos artísticos. Esta edición é un soño persoal feito realidade, especialmente por contar con Andrés Suárez no cartel”, afirmou. Tamén agradeceu o traballo constante da AECC en apoio ás persoas diagnosticadas e ás súas familias.
Pola súa banda, Germán Rodríguez-Saá subliñou o enorme valor social dunha gala coa que a entidade mantén unha estreita relación desde os seus inicios. Destacou que iniciativas como esta permiten visibilizar a realidade do cancro, impulsar proxectos de atención e reforzar os programas que a AECC desenvolve na provincia.
Cartel de luxo para unha edición especial
O evento contará cun elenco artístico encabezado polo cantautor Andrés Suárez, ademais de Marta Doviro, a Real Banda de Gaitas da Deputación de Ourense, Castro Floxo, Dantzari Danzas do Mundo e a ourensá Daniela González. Todo o recadado destinarase integramente aos programas da AECC en Ourense, que nas nove edicións anteriores xa recibiron máis de 50.000 euros grazas á colaboración do público e das entidades participantes.
As entradas teñen un prezo de 10 € e poden adquirirse na sede da Asociación —único punto de venda física— e en Ataquilla.com. Tamén está dispoñible a fila 0 para doazóns.
A gala está organizada pola Asociación Cultural As Canellas e producida por Afouteza Producións e Abella Creativa, co apoio do Concello de Ourense, Deputación de Ourense, Auditorio Municipal e Xunta de Galicia.