Os clubs Ximnasia Pavillón Ourense e Escola Pavillón lograron clasificar catro dos seus conxuntos para as Copas de España que se disputarán en Granada entre o 1 e o 4 de maio.
A cita nacional foi precedida polos controis federativos celebrados o sábado 5 en Ourense, onde o Club Ximnasia Pavillón exerceu de anfitrión.
Ximnasia Pavillón e Escola Pavillón van a Granada
O Club Ximnasia Pavillón presentou tres conxuntos na categoría absoluta para optar á I Fase da Copa de España, onde era imprescindible acadar, como mínimo, a segunda posición. A categoría máis disputada foi a sénior, cun alto nivel competitivo e representación dos clubs Oleiros, María Barbeito e Pavillón.
O conxunto sénior M —formado por Candela, Laura, Noa, Claudia e Mariña— logrou a clasificación grazas ao seu segundo posto. Pola contra, o conxunto sénior P —Martina, Xisela, Sheila, Maya, Daniela e Gretel— quedou fóra da clasificación ao rematar en terceira posición.
Na categoría infantil, o conxunto ourensán composto por Lara, Carla, Olga, Claudia e Bianca proclamouse campión grazas á súa sólida actuación co exercicio de pelotas e cintas, demostrando experiencia e seguridade.
Pola súa banda, o club Escola Pavillón tamén colleitou excelentes resultados. Os seus dous conxuntos base —cadete e alevín— competiron co obxectivo de obter praza na Copa Base de Conxuntos. O equipo cadete, integrado por Mónica, Laura, Lara, Daniela, Noa e Nicole, acadou o segundo posto cunha actuación moi precisa. O conxunto alevín —formado por Marina, Area, Alicia, Valeria R., Mara e Valeria V.— proclamouse campión da súa categoría.
Estes catro conxuntos ourensáns seguirán adestrando intensamente nas próximas semanas para perfeccionar os seus exercicios, guiados polas súas adestradoras Natalia Gómez, Alba Estévez, Yaiza Rodríguez e Raquel Dafonte.