As Xornadas de Folclore da provincia de Ourense celebran este verán o seu 40 aniversario cun programa que traerá a riqueza cultural de catro continentes a vilas e cidades ourensás.
Do 11 ao 21 de agosto, seis agrupacións folclóricas procedentes de Arxentina, Chile, Filipinas, Irlanda do Norte, Ucraína e Xeorxia actuarán en 16 localidades da provincia, reunindo a 187 artistas en escenarios ao aire libre e de acceso gratuíto.
Ourense celebra 40 edicións das Xornadas de Folclore
O evento foi presentado esta mañá no Pazo Provincial polo vicepresidente segundo da Deputación, César Fernández; a directora territorial da Consellería de Cultura, Lingua e Xuventude, Sandra Quintas; e o director das xornadas, Julio Fernández Senra. Todos eles coincidiron en subliñar a relevancia cultural desta iniciativa, que conta cunha media de 20.000 espectadores por edición grazas ao seu carácter itinerante.
“Cumprir 40 edicións fala da súa importancia como escaparate da diversidade folclórica internacional”, destacou Fernández. O vicepresidente tamén puxo en valor a cooperación institucional e cidadá como chave do éxito dun evento plenamente consolidado “no verán ourensán en galego”.
Sandra Quintas salientou a súa “contribución á dinamización das vilas e cidades, que durante uns días se converten en epicentros de cor, música e encontro multicultural”.
Pola súa banda, Julio Fernández agradeceu o labor de organización e coordinación do Centro de Cultura Popular Xaquín Lorenzo. Tamén agredeceu a implicación dos guías, voluntariado, directores dos centros de acollida e da veciñanza, “que fan posible un espectáculo de primeiro nivel cunha selección de grupos representativos do folclore internacional”.
Cada noite, a programación ofrecerá dous espectáculos simultáneos en dúas vilas distintas, cunha duración aproximada de dúas horas. Cada actuación estará a cargo de tres das agrupacións participantes, que mostrarán ao público a súa música, danza e vestiario tradicional.
Grupos participantes nas Xornadas de Folclore
A cerimonia inaugural terá lugar o 11 de agosto no Teatro Principal de Ourense. As seguintes actuacións celebraranse en Allariz, A Rúa, Bande, O Barco, Carballiño, Castro Caldelas, Celanova, Entrimo, Maceda, Manzaneda, Ribadavia, Trives, Verín, Viana do Bolo e Xinzo de Limia.
As agrupacións convidadas son:
- Huayra Muyoj (Arxentina),
- Ballet Municipal de Rancagua (Chile),
- Royal Tara Dance Academy (Irlanda do Norte),
- Folk Dance Ensemble Volynianka (Ucraína),
- National Honored Song and Dance Ensemble Georgian Folklore ‘Tsumu’ (Xeorxia) e
- grupo de Filipinas aínda non revelado.
Durante a súa estadía na provincia, os grupos serán aloxados no Centro Residencial Docente de Ourense e no IES Universidade Laboral.