O delegado territorial da Xunta en Ourense, Manuel Pardo, visitou esta mañá o concello de Monterrei para supervisar, xunto ao alcalde José Luis Suárez, os traballos de desentullo e limpeza nas edificacións danadas pola vaga de lumes do pasado mes de agosto no lugar da Caridade.
Estas actuacións realízanse ao abeiro do convenio entre a Consellería de Presidencia, Xustiza e Deportes e o municipio, cun investimento de máis de 225.000 euros.
A Xunta supervisa en Monterrei os traballos de limpeza tras os incendios de agosto
A primeira fase inclúe a demolición de cubricións que quedaron sobre muros, a retirada de tabiquerías interiores en mal estado, vigas de castiñeiro calcinadas e entullos colapsados. Tamén se leva a cabo a limpeza e restauración ambiental das infraestruturas, equipamentos e bens municipais afectados polos incendios.
Pardo destacou que a Xunta asinou 46 convenios con concellos galegos para paliar os danos municipais, cun importe global de 5 millóns de euros. A maior parte destes fondos destináronse a municipios ourensáns: 35 concellos reciben máis de 4,1 millóns. Na comarca de Monterrei, o investimento supera o millón de euros. Esta cantidade está repartida entre Cualedro (243.937 €), Laza (156.259 €), Oímbra (230.962 €), Riós (69.786 €), Vilardevós (80.092 €) e Monterrei (225.734 €).
En canto ás vivendas afectadas, o delegado lembrou que xa se concederon 7 axudas, que suman máis de 600.000 euros, seis delas en Monterrei e unha en Cualedro.
Pardo explicou que estas achegas municipais cobren gastos de reparación, mantemento e reposición de infraestruturas. Tamén cobren limpeza, restauración ambiental e custos asociados ao operativo de extinción. As axudas tamén inclúen o alugueiro e mantemento de maquinaria, así como os gastos derivados do traslado ou aloxamento de poboación evacuada e persoal municipal. Entre as actuacións subvencionables figuran tamén compensacións a veciños que colaboraron na extinción.
Monte Veciñal en Man Común de Flariz
Posteriormente, o delegado desprazouse ao Monte Veciñal en Man Común de Flariz. Alí remataron recentemente traballos preventivos financiados con preto de 40.000 euros dentro do Fondo Estratéxico da PAC. Estas actuacións incluíron a roza de 0,94 hectáreas de matogueira, a instalación de 1.561 metros de peche con estacas de madeira e malla cinexética e a colocación de tres portas de aceiro.
Nese punto, Pardo avanzou que a Consellería do Medio Rural incrementará un 50 % o investimento en prevención de incendios en 2026. Con 75,38 millóns de euros, reforzará tamén o apoio a particulares e concellos mediante o convenio para a xestión da biomasa nas faixas secundarias. Ademais, a Xunta duplicará o investimento do convenio coa FEGAMP e Seaga. Pasará dos actuais 12 millóns a 25 millóns de euros en 2026, co obxectivo de garantir o cumprimento das obrigas e protexer os núcleos de poboación.