O subdelegado do Goberno en Ourense, Eladio Santos, reuniuse esta mañá en Valdeorras con representantes da Asociación Empresarial de Valdeorras (AEVA) e do Centro Comercial Aberto O Barco.
Este encontro tivo como obxectivo informar sobre as recentes axudas do Goberno de España destinadas ao fomento da actividade económica das pequenas empresas mediante incentivos para a contratación.
O Goberno impulsa incentivos para a contratación en pequenas empresas de Valdeorras
No encontro participaron a presidenta e a xerente de AEVA, Araceli Fernández e Teresa García, e o presidente e a xerente do CCA O Barco, Jacobo Arias e Ángeles Vispo.
O Ministerio de Traballo e Economía Social, destina 13 millóns de euros a Galicia para incentivar a contratación de colectivos específicos. Entre os beneficiarios destas axudas inclþnse parados de longa duración, maiores de 52 anos, mulleres, persoas con discapacidade, xente nova, emigrantes retornados e estranxeiros. Ademais, estas subvencións buscan incrementar a duración dos contratos, ampliar a xornada laboral e fomentar a creación de postos de traballo adaptados a persoas con discapacidade. O 70% dos fondos proveñen do Ministerio, mentres que o 30% restante corresponde á Xunta de Galicia.
Dixitalización das empresas: Kit Dixital e Kit Consulting
Ademais dos incentivos á contratación, o Goberno impulsa programas como o Kit Dixital e o Kit Consulting, orientados á dixitalización das pequenas empresas.
O Kit Dixital ofrece axudas de entre 2.000 e 12.000 euros para empresas de ata 50 traballadores. Estas axudas serven para mellorar a súa competitividade mediante solucións dixitais como a presenza en Internet, a xestión de redes sociais, o comercio electrónico e a ciberseguridade.
Pola súa banda, o Kit Consulting facilita asesoramento dixital en materias como intelixencia artificial, análise de datos, estratexia de negocio e ciberseguridade. As contías das axudas varían segundo o tamaño da empresa:
- 12.000 euros para empresas con entre 10 e 50 empregados,
- 18.000 euros para aquelas de 50 a 100 traballadores, e
- 24.000 euros para as que contan con entre 100 e 250 empregados.
Ata a data, estas iniciativas suman un investimento de 3.067 millóns de euros para o Kit Dixital e 104 millóns de euros para o Kit Consulting, financiados con fondos europeos e xestionados polo Ministerio de Transformación Dixital e Función Pública.
Inquedanzas do tecido empresarial de Valdeorras
Durante a reunión, o subdelegado do Goberno recolleu as inquietudes de AEVA sobre a súa sustentabilidade económica. Estas destacaron a necesidade de atopar novas liñas de financiamento para garantir o asesoramento ás empresas da comarca. Ademais, os representantes empresariais expresaron a súa preocupación pola burocracia asociada á tramitación das subvencións. En moitos casos, o tempo que transcorre entre a convocatoria e a concesión efectiva das axudas resulta excesivo para as pequenas empresas.