A novena edición de Antiq Auria, presentada esta mañá en Expourense, chega esta fin de semana ao recinto feiral consolidada como “a mellor feira de antigüidades de Galicia”, segundo a Asociación Memoria Antiga, organizadora do certame.
O evento reunirá 50 expositores de cinco países —España, Portugal, Bélxica, Suíza e Francia— que porán á vista do público máis de 20.000 pezas.
A novena Antiq Auria enche Expourense coa mellor oferta de antigüidades
Os responsables da asociación explicaron que Antiq Auria é xa “unha das mellores feiras do noroeste peninsular”, unha valoración que lles trasladan tanto profesionais como visitantes. A iniciativa conta coa colaboración de Expourense e co apoio da Deputación Provincial de Ourense.
Presentación oficial e referencia nacional
No acto de presentación participaron o deputado provincial Rosendo Fernández, a directora territorial de Economía e Industria, Alicia López, e o director xerente de Expourense, Rogelio Martínez. En representación de Memoria Antiga interveu Gerardo Román, cofundador da entidade xunto a José Antonio Ferreiro.
Desde a asociación destacan que o mercado de antigüidades en Ourense é “un referente nacional pola súa calidade, variedade e tradición entre a cidadanía”. Tamén salientan o alto grao de fidelidade dos expositores: “Encántalles vir a Ourense, sentirse cómodos e gozar da cidade e da súa gastronomía; uns cóntanlles a outros o bo ambiente e cada ano súmanse novos profesionais”.
Expositores de Europa e obxectivo didáctico
Un 25% dos participantes procede de Portugal, e volverán expoñentes habituais dos grandes mercados europeos de Francia, especialmente os de Montpellier, Avignon ou Beziers, que concentran algúns dos anticuarios máis prestixiosos.
O obxectivo da feira é “poñer en valor o antigo e fomentar o agarimo polos obxectos que forman parte da nosa historia”. Ademais de espazo de compra, Antiq Auria permite tasar e vender obxectos antigos que os visitantes teñan nos seus fogares.
Un percorrido pola memoria
A mostra ofrece un auténtico viaxe ao pasado, desde pezas dos séculos XVIII e XIX ata artigos das décadas de 1980 e 1990. Divídese en tres áreas:
- Antigüidades (máis de 50 anos): xoias, porcelanas, prata, mobles, reloxos, teléfonos ou xoguetes.
- Coleccionismo: numismática, filatelia, militaria ou obxectos relixiosos.
- Vintage (século XX): artigos que marcan tendencia en decoración de fogares e negocios.
A organización agarda superar as 2.500 visitas da última edición.
Gran subasta o domingo
O domingo 30 de novembro celebrarase de novo a gran subasta, ás 12.00 horas. Cada expositor cederá unha peza cun prezo de saída de 5 euros, unha ocasión “para facerse con obxectos únicos a moi bo prezo”.
Horarios e entradas
- Venres 28: 16.30 a 21.00 h
- Sábado 29 e domingo 30: 10.00 a 14.00 h e 16.30 a 21.00 h
- Entrada: 3 euros (gratuíta menores de 12 anos)