A atención ao público da Tesourería Xeral da Seguridade Social e Rexistro de Ourense mudarase de localización o vindeiro luns, 16 de xuño, por mor de obras de modernización.
O cambio de sede responde ao inicio das obras de renovación na planta baixa do edificio da Rúa do Concello, 1, onde se sitúan a Dirección Provincial Conxunta do Instituto Nacional da Seguridade Social (INSS) e da propia Tesourería.
Novo punto de atención da Seguridade Social en Ourense desde o 16 de xuño
A partir das 10:00 horas do luns, 16 de xuño, a atención ao público da Tesourería Xeral da Seguridade Social e o Rexistro de Ourense trasladarase provisionalmente á Rúa Celso Emilio Ferreiro, número 2, baixo.
A actuación foi adxudicada por 241.756,6 euros e inclúe a instalación de peches con altas prestacións térmicas e acústicas, o uso de materiais sostibles e reciclables e unha completa reconfiguración do espazo administrativo. Así mesmo, cambiarase o pavimento, renovarase o falso teito, realizaranse novas divisións e procederase á pintura integral do espazo.
O subdelegado do Goberno en Ourense, Eladio Santos, destacou durante unha visita recente á sede que será reformada que «estas obras permitirán a modernización dos espazos de traballo e a adaptación da atención ao público ao século XXI«. A intervención complementa outra actuación previa na primeira planta do mesmo edificio, na que se investiron arredor de 40.000 euros para a substitución das ventás e a mellora da eficiencia enerxética.
As obras terán unha duración estimada de seis meses. Durante ese tempo, usuarios e usuarias deberán dirixirse á nova localización. Eladio Santos agradeceu a comprensión tanto do persoal como da cidadanía e recoñeceu o esforzo de todas as persoas implicadas na modernización do servizo público.
