O Concello de Barbadás detalla aos veciños o destino dos seus impostos

O Concello de Barbadás destinou 4,9 millóns de euros á prestación de servizos públicos no ano 2025, segundo recolle un folleto informativo repartido entre a veciñanza.

A través deste documento, o goberno local desglosa con claridade como se distribúe o orzamento municipal e recalca que o custo dos servizos supera amplamente a cantidade recadada mediante impostos e taxas no ano anterior, que foi de 3,9 millóns de euros.

O Concello de Barbadás detalla aos veciños o destino dos seus impostos

A achega media diaria por cidadán para manter todos os servizos municipais é de 0,96 euros. Ademais, o Plan de Obras 2025 conta cun investimento adicional de 1,1 millóns, cofinanciado pola Deputación, a Xunta e o Goberno central.

Os servizos públicos levan a maior parte do orzamento (28%), seguidos pola educación (20%), o fomento do deporte (18%) e os servizos sociais (17%). O resto repártese entre seguridade (9%), transporte (4%) e apoio ao emprendemento (3%).

O Concello subliña que o custo real de moitos servizos é moi superior ao que se ingresa por eles. Por exemplo, a Escola de Música custa 251.617 euros, fronte aos 30.555 euros recadados; o polideportivo supón 323.633 euros, pero só xera 69.056 euros; e a piscina municipal, con 67.355 euros de custo, apenas aporta 24.202 euros de ingresos.

Entre os principais gastos figuran tamén a recollida de residuos sólidos urbanos (918.117 euros), a Escola Infantil Municipal (441.417 euros), as escolas deportivas (386.703 euros), o alumeado público (209.804 euros) e a Policía Local (379.468 euros).

Con esta campaña de información, o Concello de Barbadás pretende concienciar á cidadanía sobre o valor dos servizos municipais e a importancia da contribución colectiva ao benestar común.

Listado detallado de gastos

Custo dos servizos prestados polo Concello de Barbadás en 2024, ordenado de maior a menor importe.

Folleto informativo do Concello de Barbadás