A Comisión Executiva Municipal (CEM) do PSdeG de Ourense celebrou este xoves un acto de homenaxe ás máis de 500.000 persoas que tiveron que abandonar España forzadas pola Guerra Civil e a represión franquista, coincidindo co Día das Vítimas do Exilio.
O evento contou coa colaboración da Fundación Carlos Velo (FCV) e tivo como eixo central a proxección de nove curtametraxes rodadas polo cineasta ourensán no seu exilio en México.
Ourense recorda o exilio republicano coa obra de Carlos Velo
A cita tivo lugar no Centro Cultural Marcos Valcárcel, con entrada libre ata completar aforo. No acto interviron Natalia González, secretaria xeral da CEM; Xosé Lois Carrión, secretario de Memoria da organización; e Armando González, membro da directiva da FCV e fundador da mesma.
“Mantiveron viva a chama da democracia e contribuíron, co Goberno republicano no exilio, a erosionar a ditadura e recuperar a liberdade no noso país”, destacou González, tamén portavoz do grupo socialista no Concello de Ourense.
Carrión subliñou que “os exiliados atoparon unha cálida acollida no continente americano, especialmente en México, que acolleu arredor de 50.000 españois fuxidos”. Entre eles, o cineasta Carlos Velo Cobelas, natural de Cartelle. Velo partiu ao exilio desde Saint Nazaire o 21 de abril de 1939 e chegou dúas semanas despois a Veracruz a bordo do buque Flandre.
No acto proxectáronse pezas fundamentais para recuperar a memoria colectiva do exilio republicano como:
- Los niños del Morelia,
- Éxodo, México 1939,
- Lázaro Cárdenas,
- Vida política,
- Vida cotidiana,
- Vida cultural,
- Poetas sin retorno e
- Adiós República.
Armando González, en representación da FCV, puxo o foco na figura do biólogo ourensán Carlos Velo e na importancia de preservar e difundir estas curtametraxes, testemuñas audiovisuais dun capítulo clave da historia recente.