Podemos Ourense acusa a Corporación municipal de Ourense de servilismo político ante a previsíbel aprobación esta semana dunha modificación de crédito de 6,7 millóns de euros, anunciada polo alcalde nas súas redes sociais.
A formación denuncia que o acordo sairá adiante polo apoio dos grupos que sosteñen ao goberno local e que responde, ao seu xuízo, a unha “xestión baseada en parches, improvisación e ausencia de planificación”.
Podemos Ourense critica a compra de novos autobuses e acusa a Corporación de servilismo
Segundo o partido, o elemento máis polémico é a partida de 2,5 millóns de euros para a compra de novos autobuses, mentres os coñecidos autobusiños seguen sen utilizarse e convertidos nun “símbolo do despilfarro”. Reclaman que o Concello active primeiro a frota xa adquirida antes de asumir novos gastos.
Outra das críticas céntrase nos 700.000 euros destinados a festexos, unha partida que, segundo Podemos Ourense, o goberno municipal pretende “disfrazar” de gasto cultural. A formación lembra que o Museo Municipal continúa pechado e que outros servizos culturais municipais están “abandonados”, polo que consideran unha “burla” equiparar “orquestras e atraccións” con oferta cultural real.
Desde Podemos Ourense afirman que o Pleno ten agora unha oportunidade para frear as “ocorrencias” do alcalde, a quen acusan de manter nas últimas semanas unha actitude “de confrontación” e de lanzar ataques “inxustificables” contra a clase traballadora da Praza de Abastos. Chaman os partidos da Corporación a actuar con responsabilidade e a poñer por diante o interese xeral da cidade.
A formación conclúe reclamando responsabilidade, coherencia e unha xestión centrada no ben común, afastada das medidas adoptadas “a golpe de modificación de crédito”.