Podemos Ourense insta á Xunta de Galicia a asumir de forma directa a prevención dos incendios forestais, malia as abondosas choivas rexistradas nas últimas semanas en Galicia.
A formación sinala que as precipitacións continuas non garanten a seguridade de cara ao verán se o Goberno galego non adopta medidas estruturais.
Podemos Ourense pide á Xunta asumir a prevención directa dos incendios
Desde Podemos Ourense denuncian que moitos concellos carecen de medios humanos e económicos para revisar e limpar as parcelas con risco. Esta situación compromete a protección dos núcleos habitados.
Por este motivo, a organización presenta unha emenda ao artigo 22 da Lei 3/2007 de prevención e defensa contra os incendios forestais de Galicia. Solicitan que sexa a Xunta quen dispoña de persoal especializado e medios suficientes para realizar inspeccións e executar, se é necesario, as limpezas, repercutindo os custos ás persoas titulares segundo o procedemento legal.
O portavoz de Podemos Ourense, Francisco Diéguez, asegura que “a prevención dos incendios non pode depender da capacidade de cada concello. É responsabilidade da administración autonómica garantir a seguridade de todos os galegos e galegas”. Engade que, sen medidas efectivas, Galicia podería afrontar un verán de alto risco.
A proposta inclúe coordinación coa administración local, protocolos claros de comunicación cos propietarios e inspeccións regulares, especialmente nos municipios máis pequenos.
Desde a formación enmarcan esta iniciativa nunha política integral de prevención que combine actuacións no territorio, reforzo das brigadas e maior vixilancia, co obxectivo de protexer á poboación e ao patrimonio natural galego.