O Concello do Pereiro de Aguiar presenta unha ampla programación de Nadal, pensada para todos os públicos, que inclúe actividades culturais, deportivas, familiares e solidarias ao longo de máis dun mes.
A oferta festiva, titulada “Nadal no Pereiro”, desenvolverase entre o 29 de novembro e o 10 de xaneiro, combinando tradición, ocio e participación cidadá.
Programación de Nadal 2025 do Pereiro de Aguiar
A primeira cita será o 29 de novembro, coa celebración da Copa Deputación de Kung Fu no Pavillón Municipal da Chaira, entre as 9.00 e as 20:00 horas.
A actividade solidaria tamén terá un peso destacado, coa recollida de alimentos por Pereiro F.S.F o 13 de decembro, de 17.00 a 20.00 h. O Mercadillo Solidario terá lugar ese mesmo día na Praza do Concello.
Os máis pequenos contarán con obradoiros específicos na Biblioteca Municipal os días 15 e 18 de decembro. Estes están dirixidos a nenos e nenas de 5 a 8 anos.
A música será outro dos piares da programación, con varias actuacións destacadas. O 20 de decembro, concerto de Nadal con Lapacaldas e Airiños de Foles (17:30 h no Auditorio dos Gozos) e actuacións da Coral Terras de Aguiar, tanto na residencia (16:00 h) como no Auditorio (17:00 h). O 21 de decembro será a quenda das voces infantís da Academia Musical do Pereiro, ás 12:30 h no mesmo auditorio.
As actividades continuarán o 22 de decembro con novas actuacións da Coral Terras de Aguiar e o Campamento Dixital. Esta actividade está dirixida a menores entre 9 e 13 anos, e repetirase tamén o 23 de decembro. Esta última xornada incluirá ademais unha nova sesión das Olimpíadas de Inverno, a tradicional visita de Papá Noel ao Centro de Maiores dos Gozos (16:00 h e 18:00 h) e a representación teatral infantil “En busca de Papá Noel”.
O 24 de decembro celebrarase o obradoiro “As probas dos elfos”. O 31 de decembro terá lugar un dos eventos máis agardados: a III San Silvestre Solidaria do Pereiro, con saída ás 16:30 horas desde a Praza do Concello.
Actividades en aninovo
Xa no ano novo, o programa retómase o 5 de xaneiro co Taller de Olimpíadas de Inverno pola mañá. Pola tarde será a visita das súas Maxestades os Reis Magos de Oriente, ás 17:00 h no Auditorio dos Gozos. O día 7 continuará a proposta deportiva co obradoiro “Aventura Invernal”.
O broche final chegará o 10 de xaneiro coa representación teatral “Puntadas Rebeldes”, adaptación libre de Lisístrata, a cargo da Aula de Teatro do Pereiro de Aguiar.
Ademais, ao longo de toda a programación, permanecerán abertos o Concurso de Nadal (tarxetas, adornos e vídeos) e a iniciativa “Olla o Nadal”. Este concurso anima á veciñanza a enviar fotos da decoración das súas casas e aldeas.