A reforma da planta baixa do edificio da Seguridade Social en Ourense supón un paso máis na modernización dos servizos públicos que o Goberno central impulsa na cidade.
O subdelegado do Goberno en Ourense, Eladio Santos, presentou este luns a reforma da planta baixa do edificio que acolle as Direccións Provinciais da Tesouraría Xeral da Seguridade Social e do Instituto Nacional da Seguridade Social.
O Goberno reforma as oficinas da Seguridade Social en Ourense
A actuación, adxudicada por 241.756,6 euros (IVE incluído), pretende adaptar o espazo administrativo “ás necesidades do presente e do futuro”, segundo indicou o representante do Executivo estatal.
Acompañado do subdirector provincial de Xestión Recaudatoria, Juan Carlos Blanco, Santos salientou que a obra permitirá modernizar os espazos de traballo e mellorar a atención ao público, sen esquecer a protección arquitectónica do inmoble situado na Rúa do Concello, 1. “Todo está pensado para mellorar as condicións de traballo do persoal e o servizo aos cidadáns”, engadiu.
A intervención inclúe a instalación de cerramentos con altas prestacións acústicas e térmicas, o emprego de materiais sostibles e non contaminantes, e unha reconfiguración completa da zona administrativa. Renovarase o pavimento, substituiranse as placas do teito, crearase unha nova distribución funcional e pintarase todo o espazo.
Durante os seis meses previstos de duración da obra, o persoal será trasladado temporalmente a unhas oficinas situadas na rúa Celso Emilio Ferreiro. O subdelegado agradeceu a comprensión tanto dos traballadores como dos usuarios do rexistro, que deberán desprazarse á nova localización durante ese tempo.
Santos destacou tamén que esta reforma se suma á mellora en marcha na primeira planta do mesmo edificio, onde se están a substituír as ventás cun investimento adicional de preto de 40.000 euros, co obxectivo de aumentar a eficiencia enerxética.
Para o subdelegado, esta actuación demostra “o compromiso do Goberno de España cos servizos públicos e coa modernización da Administración en Ourense”, e engadiu que o Executivo estatal segue a apoiar proxectos clave para a cidade como a chegada da alta velocidade, a mellora das comunicacións viarias, as humanizacións de rúas ou a posta en valor do Museo Arqueolóxico e da estación de San Francisco.