O subdelegado do Goberno en Ourense, Eladio Santos, participou esta mañá en Maceda na presentación dunha unidade móbil da Policía Nacional.
Esta unidade servirá para a expedición e renovación de DNI e pasaportes.
Nova unidade móbil da Policía Nacional para DNI e pasaportes en Ourense
A Policía destinará un total de seis vehículos deste tipo a Galicia, os cales percorrerán 75 municipios carentes de comisaría. Estas unidades prestarán servizos de renovación e expedición de DNI e pasaportes entre os seus veciños, trámites que ata o momento non podían ser realizados fóra das dependencias policiais.
Agora, con esta unidade móbil os usuarios sairán en 10 minutos co seu novo documento identificativo. Ata o momento era preciso un día para realizar a pegada dactilar nas localidade rurais, outro para a impresión nunha comisaría e un terceiro para facer entrega ao cidadán.
Este vehículo percorrerá os principais municipios, salvo aqueles que contan con oficina da Policía Nacional, como é o caso de Verín e O Barco.
Durante a presentación en Maceda, o subdelegado do Goberno en Ourense, Eladio Santos, fixo fincapé en que é unha mostra máis de que “a Administración Xeral do Estado está no rural”.

Trátase dunha iniciativa estatal que se suma ao programa “A Administración Preto de Ti”. Funcionarios da Subdelegación do Goberno trasládanse ata os concellos de menos de 8.000 habitantes para a expedición do certificado dixital. Tamén facilitarán a expedición dos certificados do INSS e o SEPE, para achegar á cidadanía os seus trámites máis habituais.
Na presentación desta unidade móbil da Policía Nacional tamén estiveron presentes o comisario xefe provincial, Juan Cástor Vázquez, e a alcaldesa de Maceda, Uxía Oviedo.