O subdelegado do Goberno en Ourense, Eladio Santos, mantivo esta mañá un encontro con representantes do Comité de Memoria Democrática da Comarca de Celanova.
Durante o encontro analizaron o estado dos proxectos postos en marcha desde a entrada en vigor da Lei de Memoria Democrática.
Reunión en Ourense para avaliar os proxectos de memoria democrática en Celanova
A aplicación desta normativa permite que o Goberno transfira anualmente fondos ás comunidades autónomas para iniciativas relacionadas coa recuperación da memoria histórica, como a investigación de fosas comúns. No caso de Galicia, no último ano asignáronse 76.300 euros para estas accións.
Parte destes fondos destináronse a proxectos en Ourense, especialmente na comarca de Celanova, onde se está a traballar na busca de restos na fosa común de San Breixo, ademais da dignificación de espazos de enterramento e a promoción de lugares vencellados coa memoria democrática. Un destes sitios é o antigo cárcere franquista situado no interior do Mosteiro de San Rosendo, actualmente ocupado polo IES Celso Emilio Ferreiro.
Durante a reunión, os representantes do Comité informaron de que no vindeiro mes de marzo se celebrará un acto en lembranza dos milleiros de persoas que pasaron por este recinto. Ademais, tratouse a exhumación de vítimas da ditadura na zona, cuxos restos foron entregados ás súuas familias.