O grupo municipal Ribeiro en Común denunciou publicamente a mala xestión do goberno local de Ribadavia na organización da Mostra Internacional de Teatro (MIT) 2025, cualificándoa de «chapuza».
Segundo o colectivo, a falta de previsión e xestión por parte do alcalde e da concelleira de Cultura está a poñer en perigo a continuidade e calidade do evento.
Ribeiro en Común critica a xestión da MIT 2025 por parte do goberno local
Entre as críticas expostas, Ribeiro en Común sinala que o proceso de selección dunha nova dirección para a MIT comezou demasiado tarde. A mesa de contratación non respectou os propios prazos estipulados nas bases, o que derivou en atrasos na resolución da adxudicación. Ademais, denuncian que o orzamento destinado á nova dirección permanece sen cambios, a pesar do paso dos anos e das necesidades crecentes do evento.
Outro punto de conflito é a escasa promoción da convocatoria, xa que, segundo o colectivo, non se fixo un esforzo real por asegurar a participación de profesionais do sector teatral. A ausencia de diálogo co sector cultural e teatral galego, din, repercutiu nunha baixa participación, con só tres candidaturas presentadas para dirixir a MIT 2025.
Preparación da MIT 2025
A organización da Mostra para este ano presenta un atraso considerable. Subliñan dende Ribeiro en Común que xa estamos a mediados de febreiro e que ningunha acción concreta foi levada a cabo. Ademais, critican que as bases do Premio Abrente, tradicionalmente aprobadas en xaneiro, seguen sen publicarse.
Diante desta situación, Ribeiro en Común expresou a súa profunda preocupación e esixiu ao goberno local que asuma con seriedade a organización da MIT. Sinalan que o evento é unha referencia cultural de gran importancia para Ribadavia e para a cultura galega. Esta relevancia é froito do esforzo de moitas persoas ao longo dos anos alertando que a inacción do goberno actual pon en risco este legado.
Por último, o grupo municipal insta ao executivo local a rectificar a súa actitude e a traballar en serio para garantir o éxito da MIT 2025. A pesar das críticas, expresan o seu apoio á nova dirección que se escolla, confiando en que poderá realizar un bo traballo, malia as dificultades impostas polos prazos axustados.