O grupo municipal Ribeiro en Común presentará no Pleno deste xoves dúas mocións nas que reclama medidas concretas fronte a dous problemas que, aseguran, levan tempo sen resposta por parte da alcaldía de Ribadavia.
Unha é o exceso de ruído no casco urbano e a segunda, a situación de abandono da Vila Termal de Prexigueiro.
Ribeiro en Común pide unha ordenanza de ruídos e atención ás termas de Prexigueiro
A primeira das mocións propón que o Concello elabore unha Ordenanza municipal de ruídos que garanta o dereito ao descanso da veciñanza. Ao mesmo tempo, esta ordenanza permitiría compatibilizar esta protección co lecer nocturno.
A formación lembra que existen “denuncias e malestar crecente” por parte de residentes no centro histórico. Acusa ao goberno local de “non interceder nin facer cumprir as súas obrigas legais”.
Ribeiro en Común sinala que o problema de contaminación acústica non é alleo a Ribadavia e lembra o recente caso de Ourense, onde a Fiscalía presentou denuncias contra catro pubs, o alcalde e un funcionario municipal por suposta inacción ante o ruído no casco vello. “De terse implicado o Concello, evitaríase moito conflito entre veciños”, apuntan.
O grupo propón crear unha Comisión redactora, integrada por técnicos e representantes municipais, que elabore unha ordenanza de consenso para a súa aprobación no Pleno. Ademais, insta á alcaldía a “deixar de mirar para outro lado” e a mediar entre as partes para acadar un equilibrio entre o dereito ao descanso e o dereito ao lecer.
Termas de Prexigueiro
A segunda moción céntrase na situación das termas de Prexigueiro, que, segundo a formación, sofren “desidia e abandono” por parte do goberno local. Ribeiro en Común critica que o Padroado da Vila Termal non foi convocado desde que o PP chegou á alcaldía. Denuncia que non se buscaron novos investimentos para mellorar as instalacións.
O grupo reclama que o alcalde exerza as súas funcións como presidente do Padroado, convoque a xuntanza correspondente e solicite axuda á Deputación e á Xunta para impulsar proxectos de mellora, “tal e como se está facendo noutras vilas termais da provincia”. “As promesas electorais para as nosas termas seguen sen cumprirse”, conclúe Ribeiro en Común.