A coñecida Ruta Quetzal fixo parada esta semana no concello de Barbadás para render homenaxe á escritora Carmen Martín Gaite, cunha actividade cultural que combinou literatura, mocidade e memoria.
Os 200 expedicionarios e expedicionarias da edición 2025 percorreron parte do Paseo Literario O Piñor de Carmen Martín Gaite.
A Ruta Quetzal honra a Carmen Martín Gaite en Barbadás
Durante o percorrido estiveron acompañados por monitores e polo director da Ruta, Íñigo de la Quadra-Salcedo, que mantén viva a iniciativa creada polo seu pai, Miguel de la Quadra-Salcedo.
O grupo foi recibido polo goberno local no Campo de Roma, onde gozaron dun pequeno descanso antes de iniciar a ruta. O docente e investigador David G. Couso exerceu de guía, achegándolles á vida e obra da autora e amosándolles algúns dos espazos máis significativos de San Lourenzo de Piñor. Este lugar deixou unha fonda pegada na traxectoria vital e literaria de Martín Gaite.
Durante o acto de benvida, o alcalde de Barbadás, Xosé Carlos Valcárcel, destacou o entusiasmo da mocidade e agradeceu a elección do municipio como etapa da Ruta Quetzal. “Encántannos a vosa enerxía e alegría. Demostrádelle ao mundo que a xuventude é o futuro do noso país” sinalou Valcárcel.
O percorrido rematou cunha cea no parque dos Carrís e o grupo pernoctou no Polideportivo Municipal. Íñigo de la Quadra-Salcedo agradeceu a colaboración do Concello cunha placa conmemorativa que entregou ao alcalde. Tamén destacou o apoio e compromiso de Barbadás coa cultura e coa mocidade.
Que é a Ruta Quetzal?
A Ruta Quetzal é un programa de formación e aventura declarado de Interese Universal pola UNESCO. Fundado en 1979 polo explorador e xornalista Miguel de la Quadra-Salcedo, ten como obxectivo unir a mozos e mozas de diferentes países nunha expedición cultural e formativa. Durante varias semanas, os participantes percorren diferentes lugares de España e América Latina combinando actividades educativas, históricas, artísticas e deportivas.
A iniciativa busca fomentar valores como a convivencia, a cooperación internacional, o coñecemento da historia común e o respecto pola diversidade cultural. Co paso dos anos, a Ruta Quetzal converteuse nun referente no ámbito da educación non formal e da promoción da mocidade, con milleiros de expedicionarios formados en máis de corenta edicións.