O pleno de Ribadavia, que se celebra hoxe ás 20:00 horas e pode seguirse en directo desde o web municipal, chega marcado polas críticas de Ribeiro en Común, que leva dúas iniciativas ás que considera graves vulneracións dos principios de transparencia e bo goberno.
Na primeira moción, a formación acusa o Concello de subastar un inmoble sen difusión pública suficiente, ao limitarse a publicar o anuncio no BOP, tal e como marca a lei, pero sen comunicalo na web municipal, redes sociais nin medios de comunicación.
Ribeiro en Común denuncia falta de difusión na subasta dun inmoble municipal
Segundo o grupo, o único concorrente foi un exconcelleiro do PP dimitido nesta lexislatura e “persoa de máxima confianza do alcalde”.
A agrupación considera que isto supón un trato desigual aos veciños: “Resulta difícil crer que só este exconcelleiro se enterara polo BOP e non por un aviso interno”, expoñen. Veciños da parroquia de San Cristovo de Regodeigón tamén trasladaron o seu malestar por non seren informados da subasta, que rematou coa venda da vivenda por algo máis de 20.000 euros.
Ribeiro en Común lembra que, no anterior mandato, cando gobernaban en coalición, as subastas contaron con “ampla difusión e total transparencia”. Agora, acusan o executivo popular de recuperar “as peores prácticas políticas dos tempos do clan Baltar” e piden o apoio da oposición para aprobar a moción.
Segundo punto: obras no BIC sen informes urbanísticos nin de Patrimonio
A segunda denuncia que chega ao pleno expón que o goberno local estaría executando obras en locais afectados polo PEPRI e situados no BIC de Ribadavia, sen informes técnicos da Oficina de Urbanismo, sen informe sectorial de Patrimonio e sen pasar pola Comisión de Seguimento do PEPRI, onde están representadas Xunta e Concello.
A formación qualifica a situación de “grave incumprimento da legalidade” e alerta de que podería derivar en prexuízos para o Concello e para os propietarios dos locais no momento de solicitar licenzas.
Critican ademais que o executivo contratase por contrato menor a un arquitecto privado, evitando así a intervención do persoal técnico municipal. Ribeiro en Común lembra que o PP non cubriu a baixa da arquitecta municipal e denuncia unha “derrogación á carta da normativa urbanística”.
O grupo advirte de que estes incumprimentos poderían incluso ter consecuencias xudiciais: “É especialmente grave que o propio Concello non cumpra a súa normativa urbanística nas súas promocións”.