As Xornadas de Memoria Antifascista sobre a Transición Española conclúen este sábado na Casa dos Poetas de Celanova cunha completa xornada matinal e vespertina centrada na análise histórica e na memoria democrática.
Este encontro reúne voces destacadas do pensamento, da investigación e da loita antifranquista en Galicia.
A Casa dos Poetas acolle a última sesión das Xornadas de Memoria Antifascista
Pola mañá, ás 11:45 horas, presentarase a obra colectiva A Transición en Galiza (Ed. Laiovento, 2023), un volume que reúne catorce ensaios sobre a evolución social e política do país. No libro recóllese a reflexión do historiador Justo Beramendi, quen lembraba que a Transición “non foi exclusivamente de mutación política, senón tamén aceleración doutros cambios de índole social, ideolóxica ou cultural”.
A activista Adela Figueroa Panisse, catedrática de Bioloxía, fundadora de ADEGA e da Asociación Socio-Pedagóxica Galega, abrirá a sesión. Será coa presentación do libro e un percorrido pola súa experiencia nos movementos sociais da época, especialmente no ecoloxismo e na defensa dos dereitos lingüísticos.
De seguido, o investigador Francisco Xabier Redondo abordará a persecución ideolóxica e a represión xudicial en Galicia entre 1964 e 1976. Será a través da actividade do Tribunal de Orde Pública (TOP). Esta actividade era contra “a complexa acción colectiva unidireccional pola democracia e as liberdades” que se articulou no tardofranquismo.
Mesa redonda pola tarde: A Transición en Ourense
Xa pola tarde, ás 16.30 horas, celebrarase a mesa redonda A Transición en Ourense, tamén na Casa dos Poetas. O encontro estará moderado por Moncho Boán, membro do Comité de Memoria Histórica da Comarca de Celanova. Este acto reunirá a catro figuras moi vinculadas á loita antifranquista na provincia desde ámbitos comunistas e nacionalistas: Dolores Alonso Reverter, Nemesio Barxa, Manuel Peña-Rey e Alfredo Suárez Canal, todos eles nomes recoñecidos na memoria democrática ourensá.
