A Pobra de Trives celebrará este sábado, 29 de novembro, a 20ª edición dos Cantos de Taberna, unha cita xa emblemática organizada pola A.C. A Caniceira e As Macizas Centrais.
Nesta edición de 2025, reuniranse vinte grupos chegados das provincias de Ourense, Lugo e Pontevedra.
Trives celebra a 20ª edición dos Cantos de Taberna con vinte grupos
A xornada comezará ás 12:00 horas cos cantos cativos, protagonizados por Cé Orquestra Pantasma, unha actividade pensada para que a rapazada tamén se achegue á tradición musical.
Pola tarde, ás 18:30 horas, os diferentes grupos concentraranse na Praza do Pilón, para iniciar os cantos ás 19:00, repartidos polos distintos locais colaboradores. A organización lembra que, no caso de choiva, o encontro inicial trasladarase ao antigo colexio de Santa Leonor.
Nesta edición especial participan vinte formacións que representan a diversidade do canto tradicional galego, con representación de municipios como A Merca, Castro Caldelas, A Pobra de Trives, Amoeiro, Xinzo de Limia, Bóveda, Monforte ou A Illa de Arousa, entre outros.
Os cantos desenvolveranse polos seguintes establecementos da vila: Quintela, Casanova, O Paíño, A Cantina do 4, Boliche, Manolo’s, O Bodegón, Sky, A Pluma e O Cafeto.
2 comentarios