O subdelegado do Goberno en Ourense, Eladio Santos, presentou hoxe no centro penitenciario do Pereiro de Aguiar un Punto Violeta permanente.
Este espazo está destinado a ofrecer protección, información e atención fronte á violencia de xénero.
O cárcere do Pereiro activa un Punto Violeta permanente contra a violencia machista
O centro penitenciario do Pereiro de Aguiar conta desde hoxe cun Punto Violeta permanente, un espazo de referencia para a loita contra a violencia machista dentro do sistema penitenciario. A iniciativa foi presentada polo subdelegado do Goberno en Ourense, Eladio Santos. O subdelegado destacou que será “un lugar de protección e información” para vítimas de agresións machistas. Estivo acompañado na visita polo director do centro, Francisco González.
Para a súa posta en marcha, o persoal do cárcere recibiu formación específica a cargo da xefa da Unidade contra a Violencia sobre a Muller da Subdelegación do Goberno, Alida Iglesias. A sesión abordou os protocolos de actuación ante calquera situación de violencia, tanto entre persoas internas como cara a visitantes. Tamén incluíu o reparto de materiais informativos sobre recursos como a aplicación Alertcops, o centro de crise 24 horas ou os Centros de Información á Muller (CIM).
Eladio Santos subliñou o compromiso do centro nesta causa e lembrou que “a violencia contra as mulleres é unha lacra que non cesa e que na provincia de Ourense xa deixou unha vítima mortal este ano”. Reivindicou, ademais, a necesidade de “implicación de toda a sociedade e o traballo coordinado das Administracións para acadar unha igualdade total”.
A apertura oficial quedará completada coa sinatura do protocolo entre o centro penitenciario e a Delegación do Goberno contra a Violencia de Xénero.
O Punto Violeta é unha ferramenta promovida polo Ministerio de Igualdade para fomentar a implicación cidadá contra a violencia de xénero. Tamén serve para difundir información esencial para saber como actuar ante un caso. Ó mesmo tempo, pretende achegar ás vítimas os servizos de apoio a través da súa contorna máis próxima.