A Escola Superior de Arte Dramática de Galicia (ESADg) celebra o seu 20º aniversario abrindo unha nova etapa marcada por cambios estruturais e a chegada, por primeira vez, dun equipo directivo conformado integramente por profesorado do propio centro.
Un dos nomes máis destacados desta nova dirección é o do ourensán Roberto Pascual, natural do Carballiño, cuxa traxectoria o converte nun referente das artes escénicas contemporáneas en Galicia.
A ESAD inicia nova etapa con Roberto Pascual no equipo directivo
O carballiñés é unha das figuras clave na renovación da escola superior de arte dramática galega.
Pascual é Doutor en Estudos da Literatura e da Cultura pola Universidade de Santiago de Compostela e foi director artístico da Mostra Internacional de Teatro de Ribadavia (MIT) durante quince anos, ata 2024. Ademais de ser membro do Consello da Cultura Galega e do Consejo Artístico do INAEM-Ministerio de Cultura, colaborou en diversas iniciativas de divulgación e xestión cultural para institucións como a Radio Galega, a Deputación da Coruña, a TVG, a Universidade Complutense de Madrid ou o Instituto Cervantes.
Premiado co XX Premio Rafael Dieste en 2021 como creador, o seu labor tamén se estende a espazos internacionais dedicados ás artes escénicas, onde participou activamente en encontros e proxectos de carácter formativo e artístico.
A nova dirección, encabezada por Daniel G. Salgado, buscará mellorar a calidade educativa, impulsar a transición do alumnado á vida profesional e reforzar a proxección externa do centro. Este novo ciclo chega tras a etapa de consolidación liderada por Manuel F. Vieites e Roberto Relova.
A ESADg enfróntase agora ao reto de adaptarse ao novo marco legal das ensinanzas artísticas superiores, que equipara formalmente estas titulacións á educación universitaria. Este cambio normativo permitirá ofrecer graos, posgraos e programas de doutoramento en colaboración con universidades, ademais de abrir camiños cara á semipresencialidade, a virtualización e os campus interdisciplinares.
Roberto Pascual, con ampla experiencia tanto na dirección escénica como na análise crítica e divulgación teatral, representa un dos piares desta nova etapa. A súa presenza no equipo directivo supón unha aposta decidida pola excelencia académica e pola conexión do centro co tecido cultural galego e internacional.