O delegado territorial da Xunta en Ourense, Manuel Pardo, visitou esta mañá a tenda de xoguetes Jungla Kids con motivo do lanzamento da nova edición dos bonos Activa Comercio.
Esta iniciativa do Goberno galego busca impulsar o consumo e fortalecer o comercio de proximidade.
A Xunta mobiliza 8,5 millóns coa nova edición dos bonos Activa Comercio
Nesta segunda convocatoria do ano, a Xunta destina 2,5 millóns de euros, coa previsión de mobilizar arredor de 8,5 millóns en vendas nos establecementos galegos.
Pardo destacou que desde a súa activación, onte ás 09:00 horas, a resposta foi “moi positiva”, con máis dun milleiro de comercios adheridos en toda a provincia de Ourense. En menos de 24 horas, os bonos xa permitiran trocar máis de 213.000 euros en descontos, o que se traduce nunha mobilización total de vendas próxima ao millón de euros.
“É unha mostra do noso compromiso co comercio polo miúdo, unha actividade vital na xeración de riqueza e emprego, na fixación de poboación e na vertebración das nosas vilas e cidades”, subliñou o delegado territorial.
Os bonos Activa Comercio permiten ás persoas consumidoras descargar un desconto de 30 euros na web. Este desconto poden empregalo directamente na compra de produtos e servizos nos establecementos adheridos. Quedan excluídas as tarxetas regalo e vales similares.
Como novidade desta edición, os comercios que xa participaron na primeira convocatoria non precisan volver inscribirse, o que simplifica o proceso. En todo caso, aqueles que aínda non o fixeran poden sumarse ata o 15 de decembro, ou ata o esgotamento do crédito dispoñible.
Durante a súa visita, Manuel Pardo insistiu en que o comercio local é prioritario para o Goberno galego:
“Pretendemos poñer á disposición do noso comercio todas as ferramentas necesarias para afrontar os retos do futuro e garantir a remuda xeracional, clave para o seu mantemento e crecemento”, afirmou.