A Asociación Galega das Castañas e dos Soutos organiza o vindeiro xoves 12 de xuño unha xornada técnica en campo para mostrar o uso de drons na aplicación de bioestimulantes sobre castiñeiros.
A actividade será gratuíta e aberta ao público. Non será necesaria unha inscrición previa, e desenvolverase durante toda a mañá na aldea de Renche, no Concello de Samos (Lugo).
Demostración con drons en Samos para tratar castiñeiros
O programa comezará ás 10:00 h cunha charla a cargo do profesor Pedro Álvarez, natural da Fonsagrada. Álvarez pertence ao Departamento de Bioloxía de Organismos e Sistemas da Universidade de Oviedo.
O profesor presentará as experiencias desenvolvidas nos últimos anos en Asturias para a rexeneración de soutos, centradas na mellora da vitalidade e produtividade dos castiñeiros.
Tras a conferencia, os asistentes coñecerán o plan de ensaios con bioestimulantes que se levará a cabo nos soutos de Renche. Esta actividade conta coa colaboración da Área de Medio Rural da Deputación de Lugo e do castañicultor local Saúl Sánchez.
As aplicacións faranse cun produto da empresa Agrobio, con sede en Almería, e serán realizadas pola firma Beniu, especializada no uso de drons para tratamentos agrícolas.
Esta iniciativa aposta pola innovación tecnolóxica no sector da castaña, un cultivo clave no medio rural galego. Aumentar a resiliencia das árbores fronte aos cambios ambientais e mellorar a súa produción mediante técnicas sostibles é o obxectivo principal.