A Asociación Provincial de Empresarios de Autoescolas de Ourense celebrou este venres a súa tradicional Festa Provincial de Autoescolas. Este encontro reuniu na capital ourensá profesionais do sector e representantes institucionais.
As autoescolas de Ourense reivindican a formación e a seguridade viaria
A xornada comezou na Praza Maior, cunha exposición de vehículos das autoescolas participantes.
Posteriormente, a Confederación Empresarial de Ourense (CEO) acolleu unha charla sobre as modificacións na protección dos usuarios vulnerables da vía, en vigor desde o 1 de outubro. A sesión contou coa intervención do xefe provincial de Tráfico, David Llorente Rey.
A celebración continuou no restaurante El Coto coa recepción oficial. O presidente da asociación, Luis Novoa Fernández, destacou o traballo das autoescolas e a importancia de avanzar na formación, profesionalización e adaptación aos cambios normativos.
No acto participaron, entre outros, o presidente da Deputación, Luis Menor, o alcalde de Ourense, Gonzalo Pérez Jácome, o presidente da CEO, David Martínez, e representantes de Tráfico, da Xunta e do Parlamento de Galicia.
Un dos momentos destacados foi a homenaxe aos profesionais xubilados, en recoñecemento á súa traxectoria e contribución á formación de condutores. Os homenaxeados foron Remedios Oviedo Martínez, de MT Formación; Guillermo Pascual Rodríguez, de San Francisco; Manuel Rodríguez Gayo, de Alba; e Fulgencio Tejero Pereiro, de Ribadavia.
A xornada rematou cun sorteo de agasallos e unha sobremesa de convivencia entre os profesionais do sector. A asociación reivindicou así o papel das autoescolas na educación e seguridade viaria.