A Asociación Tangaraño Cultural aporta unha valiosa información sobre a figura do Farrumeco, o seu comportamento e recomendacións para as persoas que se achegan para gozar desta figura do Entroido.
Desde Sobradelo (Xunqueira de Ambía), recórdanos varios detalles que caracterizan ó Farrumeco para que vaiamos preparados á xornada prevista para este sábado, 20 de xaneiro, no que esta figura típica do Entroido sairá polas rúas de Xunqueira de Ambía.
Información sobre o Farrumeco
En primeiro lugar, desde a AC Tangaraño Cultural indícannos a composición do traxe que leva o Farrumeco. Botas, saía ou vestidos, mandís, unha capa e un pano forman parte da vestimenta que completa unha careta de cor branca.
A maiores, o Farrumeco pode levar como adornos un colar de castañas, allos, cebolas ou bugallos mentres porta coas mans unha vasoira, unha berza ou un toxo.
![Información sobre o Farrumeco](https://ourensenarede.com/wp-content/uploads/2024/01/farrumecos-3-569x800.jpg)
Un aspecto fundamental dos Farrumecos é o seu comportamento. Durante o seu percorrido, estas figuras do Entroido levarán a cabo numerosas trastadas entre as que se atopan subir ós balcóns, cambiar as cousas de sitio, abrirlle ás pitas ou levantar saias.
![Información sobre o Farrumeco](https://ourensenarede.com/wp-content/uploads/2024/01/farrumecos-1-450x800.jpg)
Ante este comportamento dos Farrumecos, os visitantes deberán asumir que:
- non deben obstaculizar as carreiras ou trasnadas dos farrumecos,
- tampouco lle tirarán pola roupa nin lle botarán nada ó traxe,
- non lle pegarán ó Farrumeco,
- non lle quitarán as cousas que leva nin as que colle, xa as devolverá.
![](https://ourensenarede.com/wp-content/uploads/2024/01/farrumecos-2-450x800.jpg)